O misterio da capela

Os datos para resolver o enigma da capela son aínda demasiado escasos. En paralelo á torre da homenaxe, cara ao norte, atopamos na rocha as pegadas dunha construción que apuntarían cara un templo acaroado a ese lado da torre, coa cabeceira cara ao leste e os pés cara o oeste (disposición obrigada dos templos cristiáns) e, ao mesmo tempo, accesible dende a torre, o que facilitaría ao arcebispo e aos cregos ir ata ela sen pasar polo exterior.

Nas escavacións tamén atopamos outros indicios da súa existencia, como restos construtivos, fragmentos de columnas e unha pía de auga bendita.

A localización do templo plantexa algunhas cuestións. As referencias non son moi precisas, e poderían indicar varias situacións distintas:

• Na torre da homenaxe, como sinala unha das testemuñas do preito. Unha posibilidade da que hai tradición en Compostela, onde o bispo Cresconio xa construira capelas nas torres no primitivo recinto fortificado do Locus Sanctus Iacobi.
• Que tivese un edificio propio, como indica outra testemuña. Podería estar preto da torre, acaroada a ela, como acontece noutra fortaleza da mitra compostelá: as Torres de Oeste.
• Non podemos descartar unha terceira opción, que é que tivese nun primeiro edificio de seu acorde ás necesidades dunha residencia arcebispal e que logo, en consoancia co carácter máis militar que foi acadando, se desmontase e se levase ao interior dunha das torres, para mellorar a mobilidade interna e a defensa da torre.